Huramentashon miembro nobo I promé reunion presidí pa gezaghebber remplasante

Riba 28 di novèmber 2023, Eilandsraad di Boneiru tabata tin nan promé reunion di tuma desishon bou di presidensia di Sra. Ingrid Sealy, e gezaghebber interino di Boneiru. Durante di ousensia di  gezaghebber interino aktual Sr. Oleana, Sra. Sealy mester a presidí e reunion di Eilandsraad pa promé biaha den su rol komo gezaghebber interino. Sra. Sealy a dirigí e reunion ku entusiasmo i a ekspresá su apresio, bisando: "Ta un honor pa mi pa presidí e reunion di eilandsraad di awe; ta un eksperensia nobo, pero mi ta kontentu di lo por eksperensiá momentunan importante asina aki."

Durante e reunion aki, a nombra Sr. Delno Tromp komo miembro nobo di Eilandsraad, pa remplasá Sr. Clark Abraham. Sr. Tromp su nombrashon a wordu asepta i e por a huramentá, i asina asumi su responsabilidatnan i debernan komo miembro di Eilandsraad. "Mi ta gradisí pa e konfiansa i mi ta komprometé pa mi sirbi henter mi pueblo. Tambe un danki di kurason na tur ku semper tei pa mi. Konta ku mi!”

Ku optimismo, Eilandsraad ta spera un koperashon fruktífero ku e miembro nobo i ta keda determiná pa duna nan aporte pa bienestar di komunidat di Boneiru. E reunion aki ta marka un kapítulo nobo den gobernashon di nos isla, i Konseho Insular ta firme den su intenshon pa traha huntu pa un mihó futuro pa Boneiru.