Partisipantenan a risibí sertifikado despues di kurso tokante demokrasia
Mas ku 40 partisipante a risibí nan sertifikado djaweps anochi despues di a finalisá e kurso gratis di orientashon ‘Deskubrí bo bos demokratiko!’ ku éksito. E organisashon tabata den man di Konseho Insular di Boneiru den kolaborashon ku ProDemos.
E kurso a tuma lugá for di 18 te ku 21 di mei i tabata destiná pa habitantenan ku kier a siña mas tokante demokrashia, gobièrnu i toma di desishon na Boneiru. E seshonnan a atraé un grupo variá di partisipantenan motivá ku ke kontribuí aktivamente na desaroyo di nos isla. Durante e kuater anochinan di kurso, partisipantenan a haña mas konosementu tokante funshonamentu di nos Reino Hulandes, Entidat Públiko di Boneiru i e ròl di Konseho Insular. A trata tópikonan manera influenshá toma di desishon, konosementu básiko di finansa públiko i partisipashon siviko ampliamente.
E último anochi tabata dediká na eksperensia práktiko. E partisipantenan a haña un tour den Passangrahan i a bai den kombersashon ku diferente miembro di konseho insular. Di un manera interaktivo nan a haña un bista konkretu di kon e proseso polítiko di toma desishon na Boneiru ta funshoná den práktika. Segun Grefir Insular sra. Jacqueline Harewood, e gran interes ta mustra ku habitantenan ke ta envolví ku futuro di Boneiru. “Ta hopi bunita pa mira kuantu interes tin for di komunidat pa siña mas tokante demokrasia i e funshon di Konseho Insular. Ku e kurso aki nos ta spera di stimulá habitantenan ainda mas pa pensa aktivamente i partisipá den nos komunidat”, segun Grefir Insular.
Tambe e trainers di ProDemos ta wak bek ku satisfakshon riba e siman di kurso. “E partisipantenan tabata sumamente entusiasto i envolví. Nos a tin kombersashonnan balioso tokante demokrasia, partisipashon i e signifikashon di gobernashon lokal. Ta inspirante pa mira kon grandi e motivashon ta pa kontribuí aktivamente na desaroyo di Boneiru”, segun e trainers. E entrega di sertifikadonan a tuma lugá den sala di konseho di e Passangrahan. Gezaghebber interino Ingrid Sealy a entregá esakinan na e kursistanan. Tambe representantenan di Konseho Insular, ProDemos i gezaghebber interino sra. Sealy a dirigí palabra na e partisipantenan i a felisitá nan ku a finalisá e kurso ku éksito.
Ku e kurso aki, e Konseho Insular ke sigui stimulá habitantenan pa envolví nan mes aktivamente den prosesonan demokratiko i den futuro di Boneiru.