Konseho Insular ta pidi sosten pa un posishon igual pa islanan BES

E meta di e mishon aki ta pa pidi sosten moral di e otro paisnan den Reino i pa huntu defendé derechonan di tur seis isla. E proposishon aktual di Hulanda ta nifiká ku e representantenan di pueblo di islanan BES ta wòrdu poné kompletamente un banda, miéntras ku otro grupo di interes den Hulanda sí tin bos. Esaki lo kondusí na e echo ku e bos di e islanan ta pèrdí den e mayoria di e parti oropeo di Hulanda, kaminda hopi biaha tin tiki konosementu di e situashon úniko riba e islanan.

E delegashon ta enfatisá ku aki no ta trata di supervishon debí na mal gobernashon, sino di un revishon struktural ku ta limitá seriamente e outonomia lokal i e kapasidat di aktua. Esaki ta kontradisí e palabrashonnan anterior, inkluyendo artíkulo 209 di WolBES i e “slotverklaring” di e desmantelashon di Antias Hulandes.

“E ta bai tokante nos, pero sin nos. Esaki no por. #NotAboutUsWithoutUs”, segun e delegashon kombiná.”

Komposishon di e delegashon:

E delegashon di Boneiru ta konsistí di miembronan di Konseho Insular, Sr. Benito Dirksz, Sra. Desiree Coffie, Sra. Rolanda Hellburg-Makaai, Sr. Cyril Vrolijk, i Sr. Daniel Crestian.

Adishonalmente, Sr. Clyde van Putten ta partisipá na nòmber di Konseho Insular di Sint Eustatius i Sr. Anthony Weber, Diputado di Asuntunan Konstitushonal Boneiru, na nòmber di Kolegio Ehekutivo. E miembronan di Konseho Insular di Saba i representantenan di Kolegio Ehekutivo di Sint Eustatius lo partisipá digitalmente na e reunionnan pa mustra nan sosten i kontribuí na e presentashon kombiná.

E delegashon ta wòrdu sostené pa empleadonan di Konseho Insular i Kolegio Ehekutivo di Boneiru.

Konseho Insular ta hasi un yamada na tantu e residentenan di Boneiru komo partnernan den Reino pa ta solidario i huntu lucha pa un posishon hustu i balansá di e islanan.