Konseho Insular di Boneiru den kombersashon ku RLI tokante konseho “Samen naar beter”
Riba djarason 26 di yüni, Konseho Insular di Boneiru a hasi un bishita di trabou na Raad voor de leefomgeving en infrastructuur (Rli) na Den Haag.
Durante e bishita aki, e miembronan di Konseho Insular a kombersá ku Jantine Kriens, miembro di raad i visepresidente di Rli, tokante e konseho ku publiká resientemente: "Samen naar beter" (Huntu pa mihó).
E konseho ta enfatisá e importansia di un aserkamentu konhunto i struktural di parti di Reino i e entidatnan públiko den Hulanda Karibense. E meta ta pa yega na un kalidat igual di e ambiente físiko den henter Reino. Aki ta papia di temanan manera bibienda, infrastruktura, suministro di energia, adaptashon di klima i ordenashon teritorial.
Konseho Insular a suprayá durante e kombersashon e importansia di koperashon basá riba igualdat i solushonnan personalisá. A papia, entre otro, tokante kon e konseho por kontribuí na mehorashonnan konkreto pa e abitantenan di Boneiru den e áreanan di bibienda digno, durabilidat i servisio.
E bishita a sirbi komo un oportunidat balioso pa Konseho Insular kompartí ideanan, hasi pregunta i buska mas profundidat den e rekomendashonnan ku Rli a hasi na gabinete.