Konseho Insular di Boneiru a kompletá e promé siman di bishitá di trabou na Hulanda

Konseho Insular di Boneiru a kompletá e promé siman di bishitá di trabou na Hulanda.

E bishitá di trabou aki tabata den kuadro di bishitanan importante i kòmbersashonnan pa prepará pa desafionan i desaroyonan pa futuro.
 

Djaluna a kuminsá ku seshonnan di preparashon pa e miembronan di Konseho Insular pa prosesá e informashonnan mas resien i prepará komo un grupo pa e siman ku ta yena ku bishitanan i kòmbersashonnan krusial.
 

Djamars 18 di yüni, Konseho Insular a reuní ku representantenan di organisashonnan di profeshon di konsehalnan, konseheronan i griffiernan. E tema prinsipal di e mainta tabata e desaroyo di un programa di sosten pa Konseho Insular, den kooperashon ku ministerio di BZK i Relashonnan di Reino. E idea ta pa firma un "Memorandum of Understanding" tokante e programa aki.

E mes dia ei tabatin un momento spesial durante e resepshon di despedida di Señora Alexandra van Huffelen, unda miembronan di Konseho Insular a ekspresá nan apresio pa su dedikashon i esfuerso.

Djárason 19 di yüni, Konseho Insular a bishitá e organisashon “Netherlands Institute for Multiparty Democracy (NIMD)” pa un enkuentro ku miembronan di konseho di munisipio ku resientemente a realisá un enkuesta di konsehal e asina yama "raadsenquete". E bishitá aki a yuda pa desaroyo di e tipo di enkuestanan aki pa Boneiru. 

Mas lat den dia, miembronan di Konseho Insular a reuni ku Señora Van Huffelen den edifisio di BZK. E tabata un diálogo pa finalisá e último asuntunan tokante Relashonnan di Reino. Tambe tabata un momento pa ofisialmente entregá un regalo di despedida den nòmber di Konseho Insular.

Djaweps 20 di yüni, tabatin un enkuentro ku ministerio di Finansa, unda representantenan di e islanan a kompartí nan pensamentunan i preokupashonnan tokante e plan di impuestonan. For di reunion aki a sali e plan pa e islanan konhuntamente ekspresá nan pensamentu I preokupashonnan tokante e e adaptashon I kambio nan I tambe pone mas énfasis riba e nesesidatnan i desafionan spesífiko ora ta trata impuesto riba e islanan.

Despues di esaki, un parti di e delegashon a bishitá e ministerio di OCW pa un reunion ku representantenan di e programa PRODEMOS tokante e posibilidatnan pa introdukshon di un programa di enseñansa di partisipashon pa Boneiru. Durante e enkuentro aki, a yega na un akuerdo pa na momento ku ta bek na Boneiru atendé ku e diferente departamento nan konserní pa organisá e logístiko nesesario pa e programa aki, ku ta enfoká spesialmente riba mucha nan di skol pa introdusi nan na e konsepto di demokrasia.

Djabièrnè 21 di yüni, a sigui un bishitá na “Koninklijk Nederlands Meteorologisch Instituut (KNMI)”, durante e bishita aki e miembronan di Konseho Insular di e islanan BES a siña mas tokante e manera di haña informashon meteorológiko pa e islanan. Tambe tabata oportunidat pa hasi preguntanan krítiko pa loke ta trata e informashonnan ku ta risibí.

Mirando pa dilanti, tin hopi kos den e plan di Konseho Insular, entre otro e BES Top djaluna ku tin un di e tópikonan e revishon di WOLBES i FINBES. Konseho Insular tambe lo tuma parti na e kongreso di VNG, sigui pa un bishita na Ameland kaminda lo tin un programa intensivo plan pa algun dia, ku ta enfoká riba interkambio di konosementu i eksperensia ku e komunidat lokal i gobernantenan.

Konseho Insular di Boneiru a kompletá e promé siman di bishitá di trabou na Hulanda