Konseho Insular di Boneiru a finalisá bishitá di trabou na Hulanda.

Konseho Insular di Boneiru a finalisá segundo siman di nan bishitá di trabou na Hulanda Europeo. Durante e siman aki tabatin vários enkuentro balioso ku otro representante di komunidatnan i islanan Hulandes. Tabatin tambe diferente reunion di importansia ku diferente mandatario di Hulanda.

E siman a kuminsá djaluna 24 di yüni ku e kumbre BES, kaminda representante di Boneiru, Saba i Sint Eustatius a bin huntu pa diskutí asuntunan komun i buska solushon pa retonan ku e islanan tin. Tambe pa formulá un opinion i proseso pa loke ta trata e plan di impuesto ku ta aktualmente riba mesa.

Djamars 25 di yüni, Konseho Insular a tuma parti na e Kongreso VNG. E evento anual aki a ofresé un plataforma pa diskushon tokante renovashon gubernamental, sustenibilidat i desaroyo lokal. Pa e miembronan di Konseho Insular di Boneiru, e tabata un oportunidat pa partisipá, eksperensia i risibí konosementu di otro komunidatnan Hulandes i amplia e netwerk pa por sigui interkambia di ideanan den futuro " E siman di nos bishita di trabou tabata di gran importansia pa fortalese relashonnan den reino i sigui dialoga riba asuntunan di interes general pa Boneiru," segun Benito Dirksz, miembro di e Konseho Insular di Boneiru. "Nos ta spera pa implementá e konosementu i eksperensianan ku nos a gana pa mehorá e desaroyo i bienestar di nos komunidat."

Tambe a bishitá Ameland di djárason pa djabièrnè. Aki Konseho Insular huntu ku kolegio ehekutivo I tambe representante di e otro islanan den BES a topa ku diferente mandatario nan enkarga ku e “Waddeneilanden”. Esaki a duna un oportunidat úniko pa diskushon tokante retonan i kooperashon den e ámbito di gobernashon i desaroyo. Tambe interkambiá riba diferente tópiko ku e profeshonal nan I mandatarionan enkargá ku diferente área di maneho na Ameland.

Konseho Insular a hiba un bishita di trabou produktivo na Ameland, kaminda nan a risibí konosementu riba diferente área di maneho i fortalese kooperashon.

"E bishita aki a duna nos un konosementu profundo tokante e reto komun i oportunidat ku nos ta kompartí ku otro islanan" segun Rolanda Hellburg-Makaai, miembro di Konseho Insular di Boneiru. "E diskushonnan ku nos a tene i e kooperashon ku nos a fortalese lo yuda nos pa sirbi nos komunidat mihó."

Konseho Insular di Boneiru ta kontinuá su esfuerso pa promové kooperashon i e interkambio di konosementu i eksperensia pa mehorá e kalidat di bida di e habitantenan di Boneiru.