Islanan BES ta trata revishon di kambio di lei pa WolBES i FinBES

17 di yanüari 2024, durante e di dos dia di e kumbre di konseho insular di Boneiru, Sint Eustatius i Saba, a diskutí diferente posishon relashoná ku e revishon di “Wet Openbare Lichamen Bonaire, Sint Eustatius en Saba” (WolBES) i  “Wet Financien Bonaire, Sint Eustatius en Saba” (FinBES).

Tin un konsenso fuerte tokante e nesesidat di mas partisipashon di e islanan pa ku kambionan di lei di WolBES i FinBES tumando lugá na Den Haag, i tambe pa duna mas libertat di maneho na e gobièrnunan di e islanan. Un punto krusial ku a bini dilanti for di e kambionan ku a keda presentá ta, ku ta nesesario pa pone sufisiente medionan disponibel pa e tareanan ku a keda asigná na e islanan. Tambe, durante e diskushonnan a enfatisá ku tin algun tarea kaminda no tin un repartishon klaro di responsabilidat entre e islanan i Reino.

Boneiru, Sint Eustatius i Saba ta di akuerdo ku e konsepto di 'diferensiashon'; e konsepto hudisial ku ta hasi’é posibel pa traha leinan diferente pa habitantenan di e islanan kompará ku Hulanda Europeo, hopi biaha ta afektá e habitantenan di e islanan na un manera negativo.

E kumbre, ku ta tumando lugá na Sint Maarten, tin komo meta pa yega na un kolaborashon mas fuerte i permanente entre Boneiru, Sint Eustatius i Saba, i pa determiná un posishon konhunto tokante e kambionan den WolBES i FinBES ku ta ser prepará na inisiativa di Ministerio di Asuntunan Interno i Relashonnan den Reino (BZK).

Den transkurso di febrüari i mart, e tres islanan lo tin kòmbersashon ku Den Haag tokante e kambionan planiá pa lei.